Luftë për Aeroportin e Vlorës! SPAK hyn fuqishëm në lojë
Emisioni “Në Shënjestër” ka publikuar detaje nga dosja e SPAK lidhur me koncesionin e Aeroportit të Vlorës, ku evidentohen disa shkelje të mundshme në procedurën e tenderit.
Sipas materialit, kontrata është negociuar drejtpërdrejt mes qeverisë dhe tre kompanive, pa garë reale. Një nga problematikat kryesore lidhet me faktin se një prej operatorëve, kompania “2A Group”, nuk kishte firmosur autorizimin për përfaqësimin në bashkimin e përkohshëm të operatorëve.
Një tjetër element i rëndësishëm është se kontrata për koncesionin u shpall në mars 2021, ndërkohë që shoqëria koncesionare “Vlora International Airport” u regjistrua zyrtarisht vetëm më 17 maj 2021, pra pas lidhjes së marrëveshjes.
Sipas SPAK, janë konstatuar edhe shkelje të tjera:
Mungesë e dokumentacionit financiar nga kompanitë pjesëmarrëse;
Mosdeklarim i strukturës së pronësisë deri te përfituesit fundorë;
Mosplotësim i kritereve teknike të kërkuara në tender.
Pavarësisht këtyre mangësive, bashkimi i kompanive “Mabco Construction”, “2A Group” dhe “YDA Group” u shpall fitues.
Hetimet kanë çuar në marrjen si të pandehur të 7 zyrtarëve të Ministrisë së Infrastrukturës për veprën penale “shkelje e barazisë në tendera”.
SPAK pritet të përcaktojë nëse ka përgjegjësi ligjore edhe për nivele më të larta vendimmarrjeje lidhur me këtë proces.
