Makinetat e Stafukëve, lirohet me kërkesë të Prokurorisë polici
Operacioni i bujshëm i Agjencisë së Mbikëqyrjes Policore (AMP), i koduar “Basti i Fundit”, duket se ka marrë një kthesë të papritur vetëm një ditë pas publikimit të rezultateve.
Më 7 korrik, AMP njoftoi se kishte goditur një aktivitet të dyshuar të paligjshëm të lojërave të fatit dhe basteve sportive në zonën e “Tregut Fshatar” pranë Fushë-Krujës. Sipas njoftimit zyrtar, kontrolli u zhvillua në një bar-kafe në pronësi të Ahmet Stafukës.
Një ditë më vonë, AMP bëri të ditur arrestimin e efektivit të Policisë së Shtetit, Lutfi Dervishi, me detyrë Ndihmës Specialist i Policisë në Komunitet për zonën e Fushë-Krujës. Ai u akuzua për veprat penale “Shpërdorimi i detyrës” dhe “Organizimi ose ushtrimi i veprimtarive të lojërave të fatit në kundërshtim me ligjin”.
Por zhvillimet kanë marrë një tjetër drejtim.
Sipas informacioneve të siguruara nga Prokuroria e Tiranës, kjo e fundit ka urdhëruar lirimin e tij të menjëhershëm.
Ndërkohë, në burg vijojnë të mbahen të arrestuar Sabah Stafuka dhe Fatmir Stafuka, banues në Arrameras, Fushë-Krujë. Ata akuzohen për veprat penale “Organizimi ose ushtrimi i veprimtarive të lojërave të fatit në kundërshtim me ligjin” dhe “Prodhimi dhe shitja e narkotikëve”.
