Mbi 60 gëzhoja në vendin e atentatit në Dukagjin, si u ekzekutuan në pritë babë e bir
Detaje të reja janë zbardhur nga atentati i rëndë në Dukagjin, ku Prelë Gjoni, 82 vjeç, dhe djali i tij Lekë Gjoni, 57 vjeç, u vranë me armë zjarri, ndërsa Lazër Bashi, personi i tretë që udhëtonte me ta, mbeti i plagosur.
Pamjet e fuoristradës me të cilën udhëtonin tregojnë përmasat e sulmit. Automjeti është bërë shoshë nga plumbat, ndërsa në vendin e ngjarjes janë konstatuar rreth 60 gëzhoja.
Vrasje me kallash në Kir të Dukagjinit, dy persona humbin jetën
Babë e bir po ktheheshin nga banesa e tyre e vjetër në Dukagjin drejt Shkodrës. Teksa ndodheshin ende në rrugën e fshatit Xhan, ndaj fuoristradës është hapur zjarr nga persona ende të paidentifikuar.
Prelë dhe Lekë Gjoni humbën jetën nga të shtënat, ndërsa Lazër Bashi, i cili ndodhej në pjesën e pasme të automjetit, arriti t’i mbijetonte breshërisë. Ai u transportua fillimisht në Spitalin Rajonal të Shkodrës dhe më pas drejt Tiranës për trajtim më të specializuar. Gjendja e tij raportohet jashtë rrezikut për jetën.
Në vendngjarje u angazhuan dhjetëra forca policie dhe efektivë të RENEA-s, të cilët nisën kontrollet në zonën e thellë malore për identifikimin dhe kapjen e autorëve.
Të dhënat paraprake të hetimit tregojnë se gjatë atentatit mund të jenë përdorur dy armë zjarri, një kallashnikov dhe një MP5. Ky element, së bashku me rreth 60 gëzhojat e gjetura në vendngjarje, ka ngritur dyshimet se në sulm mund të kenë marrë pjesë të paktën dy persona.
Autorët mbeten ende të paidentifikuar, ndërsa hetimet vijojnë për të zbardhur motivin e vrasjes së dyfishtë dhe personat që organizuan dhe ekzekutuan pritën.
