Moyo Drymades/ BKH monitoroi klubin e natës, 15 mijë euro rezervimi
Byroja Kombëtare e Hetimit mësohet se ka monitoruar nga afër një nga eventet më të bujshme të verës në jug të vendit, të zhvilluar në Moyo Club në Drimadhes, ku performonte DJ i njohur turk Mahmut Orhan.
Mbrëmja e 15 gushtit ka mbledhur në të njëjtin ambient biznesmenë të fuqishëm, personazhe të njohur të jetës së natës, të krimit të organizuar, zyrtarë dhe ish-zyrtarë, si edhe individë që janë ose kanë qenë në fokus të hetimeve për korrupsion, pastrim parash dhe aktivitete kriminale, shkruan InfoNews.al
Ajo që ka tërhequr veçanërisht vëmendjen ka qenë niveli i lartë i shpenzimeve. Në disa prej tavolinave, porositë mësohet se kanë arritur deri në 15 mijë euro, ndërsa në lokal janë konsumuar edhe shishe luksoze me çmime që kapnin mijëra euro.
Në event kanë qenë të pranishëm persona të lidhur me botën e biznesit, ndërtimit dhe call center-ave, si dhe individë me precedentë apo lidhje të dyshuara me trafikun e drogës dhe pastrimin e parave.
Për këtë arsye, hetues të BKH-së dhe efektivë të Policisë mësohet se kanë qenë të pranishëm në zonë, duke monitoruar jo vetëm personat që hynin dhe dilnin nga lokali, por edhe shpenzimet e kryera gjatë mbrëmjes.
Eventi ka vijuar deri në orët e para të mëngjesit, ndërsa brenda lokalit nuk ka munguar gara për tavolinat më të mira dhe ekspozimi i luksit përmes shisheve të shtrenjta, automjeteve dhe rezervimeve me vlera të larta.
Prania e BKH-së në Drimadhes e ka kthyer kështu një nga netët më të frekuentuara të sezonit turistik edhe në një pikë interesi për organet e hetimit, në një kohë kur SPAK po ndjek gjithnjë e më shumë pasuritë dhe shpenzimet e personave të dyshuar për korrupsion, krim të organizuar dhe pastrim parash. /skyweb.al
