Një ngjarje e rrezikshme është shënuar ditën e sotme në Tiranë, ku forcat speciale “Shqiponja” kanë tentuar të ndalojnë një automjet për kontroll, por drejtuesi i tij ka refuzuar të ndalojë dhe është larguar me shpejtësi.
Gjatë ndjekjes, në zonën e Saukut, automjeti ka humbur kontrollin dhe është përplasur me disa mjete të tjera në lëvizje, duke shkaktuar dëme materiale. Fatmirësisht, nga përplasja nuk raportohet për persona të lënduar rëndë.
Burime pranë uniformave blu bëjnë me dije se gjatë kontrollit të mjetit, drejtuesit i është gjetur një armë zjarri, ndërsa ai është shoqëruar në komisariat për hetime të mëtejshme.
Policia po punon për zbardhjen e plotë të rrethanave dhe pritet që ndaj drejtuesit të mjetit të ngrihen akuza për rezistencë ndaj policisë, drejtim mjeti në mënyrë të rrezikshme dhe armëmbajtje pa leje.
