Pastruan 100 milion euro, goditet në Spanjë grupi shqiptarë i trafikantëve, bashkëpunan me kinezët
Shkatërrohet në Spanjë një rrjet i madh pastrimi parash që punonte për mafian italiane dhe grupet kriminale shqiptare
Autoritetet spanjolle kanë goditur një rrjet të madh kriminal të përfshirë në pastrim parash për organizata mafioze në Itali dhe grupe të trafikimit të drogës nga Shqipëria. Operacioni u zhvillua nga Shërbimi i Mbikëqyrjes Doganore i Agjencisë Tatimore të Spanjës, në bashkëpunim me autoritetet italiane.
Sipas hetimeve, rrjeti ka lëvizur dhe pastruar nga 80 deri në 100 milionë euro në vit në vende të ndryshme të Evropës për të paktën tre vite radhazi.
Në Spanjë u arrestua drejtuesi i të ashtuquajturës “qelizë iberike” të organizatës, një shtetas italian që vepronte nga Marbella. Ai kishte rolin e mbledhjes së shumave të mëdha të parave të gatshme përmes një rrjeti dyqanesh veshjesh në Madrid, Malaga dhe Sevilje, para që më pas futeshin në një sistem të paligjshëm financiar për pastrim.
Hetimi zbuloi se organizata drejtohej nga një shtetas kinez me bazë në Prato të Italisë, i cili kishte ngritur një “bankë klandestine” që nga viti 2021. Sistemi përdorte metodën e njohur si “hawala” ose “Fei-Ch’ien”, një mënyrë informale transferimi parash që funksionon përmes rrjeteve të besimit dhe ndërmjetësve, pa kaluar në sistemin bankar tradicional.
Sipas autoriteteve, klientët kryesorë të kësaj banke të paligjshme ishin grupe të rrezikshme shqiptare të trafikut të drogës që vepronin në Italinë veriore dhe qendrore, si dhe organizata mafioze italiane.
Gjatë operacionit në Spanjë u kryen 10 kontrolle në kompani dhe banesa, ku u sekuestruan dokumente, të dhëna kontabël të fshehura, para të gatshme dhe pajisje elektronike.
Ndërkohë, në Itali u arrestuan 40 persona të dyshuar për trafik droge, emigracion të paligjshëm dhe pastrim parash. Autoritetet italiane sekuestruan gjithashtu pasuri me vlerë mbi 60 milionë euro.
Operacioni, i koduar “Easy Money” (Para të Lehta), u koordinua nga Eurojust, Europol, Prokuroria Antimafia e Firences dhe autoritetet spanjolle e italiane, duke goditur një nga rrjetet më të mëdha të pastrimit të parave të zbuluara në vitet e fundit në Evropë.
