Një ngjarje e rëndë është shënuar në orët e para të mëngjesit të kësaj të enjteje në fshatin turistik të Borshit, Himarë, ku një 33-vjeçar ka mbetur i plagosur me armë zjarri, pas një konflikti të çastit në një lokal.
Sipas burimeve nga Policia, rreth orës 02:20 të datës 31 korrik, një konflikt mes disa personave që po konsumonin alkool në një lokal ka degraduar në përdorimin e armës. Dyshohet se pas një debati verbal, shtetasi Hekuran Çelaj, 42 vjeç, banues në Borsh, ka qëlluar me armë zjarri automatike në drejtim të Erald Shullazit, 33 vjeç, banues në Krujë, duke e plagosur në dorë.
Fatmirësisht, Shullazi ndodhet jashtë rrezikut për jetën, ndërkohë që është transportuar menjëherë për ndihmë mjekësore në spital.
Pas njoftimit për ngjarjen, shërbimet e Komisariatit të Policisë Himarë janë angazhuar në terren dhe kanë mundur të identifikojnë në kohë rekord autorin e dyshuar. Hekuran Çelaj është lokalizuar dhe arrestuar, ndërsa është shoqëruar në ambientet e Drejtorisë Vendore të Policisë Vlorë, ku po merret në pyetje lidhur me rrethanat e ngjarjes.
Burime nga grupi hetimor bëjnë me dije se janë sekuestruar pamjet filmike të kamerave të sigurisë së lokalit, ndërsa janë shoqëruar për deklarime edhe disa persona të tjerë që ndodheshin në tavolinë me të dy protagonistët e konfliktit, mes tyre edhe Albert Petrit Dollaku, 43 vjeç, nga Kruja.
Ndërkohë, Policia po vijon kërkimet për gjetjen e armës së përdorur në ngjarje, ndërsa hetimet për zbardhjen e plotë të konfliktit janë në vijim.
