Dhjetëra kontrolle në banesa, ambiente biznesi dhe baza të ndryshme janë ushtruar mëngjesin e kësaj të marte në kuadër të operacionit të gjerë të SPAK, i cili ka nisur në orët e para të mëngjesit dhe vijon ende.
Burime pranë hetimit bëjnë me dije se kontrolle janë ushtruar edhe në bizneset e Klajdi Merkajt, i arrestuar më herët si pjesë e organizatës famëkeqe të Çopjave. Sipas dyshimeve të SPAK, përmes bizneseve të lidhura me Merkajn janë pastruar miliona euro, të cilat dyshohet se kanë buruar nga fondet publike të AKSHI.
Pamje filmike, telefona dhe prova kyçe
Gjatë kontrolleve janë sekuestruar dhe këqyrur kamera sigurie, telefona celularë dhe materiale elektronike, të cilat sipas burimeve hetimore, kanë sjellë prova të forta për presion, shantazh dhe detyrim ndaj biznesmenit Gerond Meçe.
Nga këto prova rezulton se Meçe është detyruar të paraqitet pranë komisioneve përkatëse dhe të tërheqë ankimimet që kishte depozituar lidhur me disa tenderë problematikë të AKSHI, veprim që dyshohet se është kryer pas dhunës dhe shantazhit për orë me radhë.
Dy tenderë kyç në qendër të hetimit
SPAK po heton në mënyrë të posaçme dy tenderë me risk ekstrem për sigurinë shtetërore:
- Tenderin për mirëmbajtjen e serverëve të Thesarit të Shtetit, ku dyshohet se grupi i strukturuar kriminal, ku sipas SPAK dyshohet se bënin pjesë Ergys Agasi dhe Ermal Beqiri, kishte në kontroll të dhënat financiare dhe transaksionet brenda dhe jashtë vendit, për shtetas shqiptarë dhe të huaj, kompani private dhe persona të ekspozuar politikisht.
- Tenderin për administrimin e dosjeve gjyqësore, ku dyshohet se i njëjti grup kishte akses në të dhëna tepër sensitive, përfshirë dosje hetimore, çështje gjyqësore dhe procesin e caktimit të gjyqtarëve.
Favorizime dhe pasuri luksoze të fshehura
Sipas hetimeve, Mirlinda Karçanaj dyshohet se ka favorizuar sistematikisht kompanitë e Ermal Beqirit, duke ndikuar në vendimmarrjen e komisioneve dhe duke garantuar fitore të paracaktuara në tenderë.
Një nga episodet më tronditëse të zbuluara nga SPAK lidhet me blerjen e një jahti luksoz, i cili dyshohet se është regjistruar në emër të një shtetaseje rumune vetëm 4 vjeçe, e lidhur me rrethin familjar apo shoqëror të Ermal Beqirit, me qëllim fshehjen e origjinës së pasurisë.
Hetim për organizatë kriminale dhe pastrim parash
SPAK po ndërton një dosje të rëndë penale për organizatë të strukturuar kriminale, korrupsion, shkelje të barazisë në tendera, pastrim parash dhe ushtrim presioni ndaj biznesmenëve, ndërsa hetimet po thellohen mbi parimin “ndiq paratë”.
Operacioni pritet të zbulojë një nga skandalet më të rënda që lidhet me sigurinë e të dhënave shtetërore, fondet publike dhe sistemin e drejtësisë, me pasoja që mund të tronditin fort institucionet.
