Tiranë — Vendimi i Postës Shqiptare për të ofruar aplikime për kredite të kompanisë së mikrokredisë Iute Credit në sportelet e saj ka ndezur debat publik dhe ka sjellë kritika nga ekspertë të ekonomisë dhe mbrojtjes së konsumatorit. Polemikat vijnë në një moment kur Banka e Shqipërisë ka paralajmëruar vazhdimisht për rritjen e rreziqeve të huadhënies së pakontrolluar dhe për pasojat financiare që mikrokreditë me interesa të larta kanë shkaktuar për shumë familje.
Në një njoftim në rrjetet sociale, Posta Shqiptare deklaroi se qytetarët mund të aplikojnë për kredi të Iute Credit “drejtpërdrejt dhe lehtësisht” në sportelet e saj. Kjo lëvizje u interpretua si shndërrim i një institucioni shtetëror në platformë shërbimi për një kompani mikrokredie, duke ngritur pikëpyetje mbi rolin dhe mandatin publik të Postës.
Sipas ekonomistëve, Posta Shqiptare nuk është institucion financiar dhe misioni i saj përcaktohet qartë nga legjislacioni për shërbimet postare. Për këtë arsye, ofrimi i aplikimeve për kredi mund të përbëjë tejkalim të kompetencave, sidomos nëse shërbimi interpretohet si ndërmjetësim financiar.
Kontrolli i Lartë i Shtetit duhet të nis një verifikim. Posta rrezikon të përdorë autoritetin e saj shtetëror për të promovuar produkte financiare me kosto të lartë për qytetarët, në një kohë kur shumë familje janë përballur me mbingarkesë borxhesh për shkak të mikrokredive.
Ndërkohë rezulton që Posta Shqiptare ka bashkëpunim të ngushtë që nga vitit 2024 me Iute Credit.
