Punonjës të padeklaruar, moslëshim fature dhe shkelje të tjera në Tregun Agroushqimor të Kasharit
Pesë kontrolle të kryera në Tregun Agroushqimor të Kasharit kanë nxjerrë në pah 15 shkelje administrative, duke vënë në fokus mënyrën e faturimit, autofaturimin, deklarimin e çmimeve dhe punonjësit e padeklaruar.
Kontrollet janë zhvilluar nga Task Forca e Administratës Tatimore. Sipas Tatimeve, shkeljet e konstatuara lidhen me mosrespektimin e detyrimeve ligjore në faturim dhe autofaturim, mungesën ose problematikat në listën e çmimeve, si edhe me punonjës të padeklaruar.
Ky aksion vjen në një periudhë kur tregu i produkteve ushqimore mbetet veçanërisht i ndjeshëm ndaj luhatjeve të çmimeve dhe dyshimeve për abuzime përgjatë zinxhirit të furnizimit. Pikërisht për këtë arsye, kontrollet nuk lidhen vetëm me formalizimin fiskal të aktivitetit, por edhe me nevojën për të rritur gjurmueshmërinë e produkteve, nga ferma deri te konsumatori.
Një nga elementët e evidentuar nga kontrollet është edhe lista e çmimeve, një komponent që merr rëndësi të veçantë në një treg ku çmimi final i produkteve bujqësore dhe blegtorale mund të ndryshojë ndjeshëm nga pika e prodhimit deri te shitja.
Tatimet u bëjnë thirrje fermerëve që të denoncojnë çdo rast kur për produktet e tyre nuk lëshohet autofaturë. Ky dokumentim është veçanërisht i rëndësishëm për formalizimin e marrëdhënieve tregtare ndërmjet fermerëve dhe subjekteve që blejnë produktet e tyre.
Përveç faturimit dhe autofaturimit, kontrollet në këtë sektor synojnë të evidentojnë edhe punësimin informal. Konstatimi i punonjësve të padeklaruar në aksionin në Kashar tregon se informaliteti në tregun agroushqimor nuk kufizohet vetëm te transaksionet dhe dokumentacioni fiskal, por prek edhe marrëdhëniet e punës. /ekofin.al
