Rolling Hills dhe Green Coast çerdhe për pastrim parash, sekuestrohet një tjetër vilë e blerë me para krimi!
Prokuroria e Tiranës njoftoi të hënën se kishte sekuestruar 18 pasuri në emër të noteres Sanja Telhallari dhe të familjarëve të saj, me dyshimin se ishin financuar nga ish-bashkëshorti i dënuar për krime të rënda në Itali.
“Nga hetimet e deritanishme ka rezultuar se gjatë periudhës 2013–2024, shtetasja S.T. ka kryer një numër të konsiderueshëm transaksionesh për blerjen e pasurive të paluajtshme, përfshirë apartamente, dyqane, poste parkimi dhe një vilë në kompleksin ‘Rolling Hills’. Në total janë evidentuar 13 pasuri të paluajtshme, me vlera të larta monetare si dhe llogari të shumta bankare,” thuhet në njoftimin për shtyp të prokurorisë.
Prokuroria ngre dyshime se të ardhurat që kanë shërbyer për pasurinë vijnë nga ish-bashkëshorti i saj Klodian Porja, i identifikuar në njoftim si K.P. Sipas prokurorisë, ky i fundit “është shpallur në kërkim ndërkombëtar nga autoritetet italiane dhe është dënuar për vepra të rënda penale, përfshirë veprën penale të ‘Shfrytëzimit të prostitucionit’, me një dënim maksimal deri në 21 vjet burgim.”
Kjo sjellë dhe njëherë në vëmendje situatën tek komlekset luksoze si Rollin Hills apo dhe Green Coast, ku vitet e fundit janë sekuestruar nga SPAK dhe Prokuroritë disa vila me vlera prej miliona eurosh të blera me para krimi. Pa një filtër të fortë ligjor e financiar, ekziston rreziku real që Green Coast, Rolling Hills dhe projekte të ngjashme të përdoren si mburojë për pastrimin e parave, duke dëmtuar imazhin e Shqipërisë dhe duke forcuar ekonominë kriminale.
Rreth një muaj më parë, Policia e Tiranës njoftoi sekuestrimin e 26 milionë e 500 mijë eurove pasuri të biznesmenit Kristian Koni, 45-vjeçar i arrestuar më herët për trafik droge në Itali. Pasuritë e sekuestruara përfshijnë 19 prona, 2 automjete luksoze dhe 20 llogari bankare të regjistruara në emër të tij. Ajo që bie në sy është fakti se pjesë e këtyre pasurive janë edhe vila luksoze në Shqipëri, të blera në zonat më të shtrenjta të vendit: Green Coast Resort dhe Rolling Hills. Sipas tregut, një vilë në Green Coast varion nga 900 mijë euro deri në 1.5 milionë euro, çmime të ngjashme edhe për rezidencat elitare të Rolling Hills.
Çfarë pritet nga SPAK?
Ky rast pritet të vendosë përpara një test të rëndësishëm SPAK-un dhe institucionet e kontrollit financiar:
• A do të nisin hetime mbi skemat e blerjes së pronave luksoze me para të krimit?
• A do të krijohen rregulla të reja që të detyrojnë kompanitë dhe bankat të raportojnë burimin e fondeve për çdo transaksion mbi një nivel të caktuar
