Rriten siguracionet, por tek SIGAL i Avni Ponarit dëmshpërblimet bien gropë për 12 muaj rresht
Siguracioni i makinës nga 1 janari 2025, ka ndryshuar dhe çmimi do të jetë i diferencuar. Të gjithë ata drejtues mjetesh që kanë shkaktuar aksidente do kenë siguracion më të lartë. Ndërsa për të caktuar vlerën e sigurimit do të merren në konsideratë edhe vjetërsia e makinës e deri tek eksperienca e shoferit. Në rregullore thuhet se vetë Shoqëria e sigurimit mund të zbatojë edhe faktorë të tjerë risku, përveç atyre të parashikuara.
Por teksa siguracioni i makinave pritet që të rritet, në bazë të aksidenteve, një fenomen I pazakontë ka ndodhur në disa prej kompanive të siguracionit të automjeteve. Të ardhurat nga primet e shkruara bruto të sigurimit për janar – nëntor 2025 kapën vlerën 24,254 milionë lekë, ose 10.17% më shumë se në janar – nëntor 2024. Gjatë periudhës janar – nëntor 2025, numri i kontratave të sigurimit të lidhura arriti në 1,506,529 me një rritje prej 4.69% krahasuar me të njëjtën periudhë të një viti më parë. Pagesat e dëmeve gjatë janar – nëntor 2025 u ulën me 3.61% krahasuar me janar – nëntor 2024. Pjesa më e madhe e dëmeve të paguara bruto i përket sigurimit motorik me rreth 5,715 milionë lekë, apo 76.33% të totalit të dëmeve të paguara bruto.
Tek kompania SIGAL e drejtuar nga Avni Ponari, vihet re që për periudhën Janar – Nëntor, ka pasur një rritje me 12.5% të Primeve të Shkruara Bruto për mjete motorrike, çka do të thotë se kompania ka arkëtuar më shumë të ardhura. Por kur vjen puna tek dëmshpërblimet, për 12 muaj rresht rezulton se SIGAL, ka ulur dëmshpërblimet për rastet e përfshirjeve në aksidente. Kjo ulje, sipas raportit zyrtar të publikuar nga AMF, rezulton të jetë gati 12%, më pak të krahasur me të njëjtën periudhë të një viti më parë, pavarëisht se ka shtuar fitimin nga Primet Bruto. Ndërkohë SIGAL, ka shënuar rënie edhe për sa i përket dëmshpërblimeve, për Kartonin Jeshil, që u nevojitet qytetarëve që udhëtojnë jashtë vendit, për tu pajirus me këto siguracion.
