Samir Mane i hap luftë Edi Ramës, kush propagandon më shumë! Bamirësi me regji dhe SPAK nëpër këmbë
Edi Rama njihet si një ndër politikanët më efektivë në shpërndarjen e mesazhit të tij, si në mediat tradicionale, ashtu edhe në ato të reja.
I tillë ka qenë edhe gjatë opozitës, periudhë të cilën pak e mbajnë mend nga 20–25 vjeçarët e sotëm.
Mënyra e artikulimit të mesazhit prej tij, stafi mjaft i aftë që ka pasur dhe ka përreth, lista e gjatë e mediave dhe faqeve në rrjetet sociale në shërbim, e kanë bërë Ramën prej gati dy dekadash një superfuqi në përcjelljen e propagandës së tij.
Kështu mendoi kryeministri deri ditën kur iu desh të publikonte një mesazh rutinë mbi instalimin e disa poltroneve në repartin e Onkologjisë në QSUT, ku pacientët do të mund të merrnin shërbimin e kimioterapisë në kushte më njerëzore.
Mirëpo, Rama do të zbulonte një ditë më pas se i kishte bërë llogaritë gabim.
Një “megalodon” propagande do të shfaqej përballë, duke kthyer breshëritë mediatike drejt qeverisë së tij dhe ministres së Shëndetësisë.
Ai quhet Samir Mane.
Duke synuar të përmirësojë disi imazhin e tij publik, në kushtet kur përmendet thuajse në çdo dosje të bujshme të SPAK-ut, duke nisur nga ajo Meta–Kryemadhi, te pastrimi i parave dhe ndonjë tunel andej nga Palasa, Samir Mane nuk mund të lejonte që operacioni i tij i PR në Onkologjik të përvetësohej nga Rama dhe Evis Sala.
Kështu, vetëm një ditë pasi Rama dhe ministrja publikuan vendosjen e poltroneve në Onkologjik, pas një fushate këmbëngulëse të gazetarit Osman Stafa, Samir Mane shpërndau një kronikë televizive, shoqëruar me një shkrim PR për portalet, duke pushtuar të gjithë median shqiptare, përfshirë faqet e memeve në Facebook e Instagram, deri te ato të gatimit.
Rama e gjeti veten në trekëndësh.
Kurrë gjatë jetës së tij nuk ishte sfiduar kështu publikisht në një sektor ku ai e mban veten për mjeshtër.
Edhe kur Berisha II kishte gjithçka në duart e tij, Ramës nuk i kishte ndodhur të hidhej “knock down” publikisht nga një rival politik, e aq më pak nga një biznesmen, për të cilin sipas SPAK-ut janë bërë edhe ligje me porosi, siç ishte ai i minierave, akuza nga të cilat biznesmeni Mane u shpëtoi vetëm sepse vepra penale e mitdhënies ishte parashkruar.
Mbetet për t’u parë nëse do t’i dalë tymi në vijim, pasi krahas faktit që njihet si mjeshtër i propagandës, Rama njihet në rrethin e ngushtë edhe si njeri që hakmarrjen e shërben si një pjatë të ftohtë…
