Shteti po i merr Aeroportin? Pse nuk flet ME DOKUMENTA Behgjet Pacolli?
Pavarësisht akuzave të forta publike, deri tani Behgjet Pacolli nuk ka bërë publike dokumente konkrete që të mbështesin pretendimet e tij për mënyrën se si po i merret Aeroporti i Vlorës. Në reagimet e tij, ai është fokusuar kryesisht te akuzat ndaj shtetit dhe ortakëve të përfshirë në projektin e ndërtimit të aeroportit, ndërsa detaje zyrtare apo prova ligjore mbi konfliktin nuk janë paraqitur publikisht.
Behgjet Pacolli: “Shteti po ma merr Aeroportin e Vlorës, por nuk do të luftoj me të”
Biznesmeni kosovar Behgjet Pacolli ka deklaruar për herë të parë publikisht se shteti shqiptar po merr nën kontroll Aeroportin e Vlorës, duke e cilësuar ndërhyrjen si të padrejtë dhe joligjore. Përmes një postimi në rrjetet sociale, ai tregoi edhe një bisedë telefonike me një gazetar shqiptar, ku theksoi se nuk dëshiron përplasje me shtetin.
Pacolli tha se objektet që kompania e tij kishte marrë përsipër të përfundonte janë tashmë të realizuara dhe se punimet përfundimtare janë kryer prej muajsh. Sipas tij, aeroporti është ndërtuar ekskluzivisht me financat e tij, me mbi 310 milionë euro investime dhe garanci të angazhuara në projekt.
“Aeroportin le ta marrin. Unë nuk dua të luftoj me shtetin. Shteti ka fuqinë e vet dhe mund ta përdorë si të dojë,” shkroi ai, duke shtuar se mënyra si po veprohet është e papranueshme për një shtet që synon të funksionojë mbi ligjin.
Ai deklaroi gjithashtu se të gjithë nënkontraktorët dhe detyrimet financiare do të shlyhen “deri në centin e fundit”, ndërsa punëtorët dhe ekspertët e angazhuar në projekt do të tentohen të sistemohen në projekte të tjera jashtë vendit.
Pacolli ngriti shqetësim edhe për trajtimin e stafit në kantier, duke thënë se ndërhyrja e policisë ka prekur dinjitetin e punëtorëve dhe ka lënë brenda ambienteve pajisje pune, sende personale dhe materiale të kompanisë.
Sipas tij, dëmi më i madh nuk është vetëm financiar, por lidhet me besimin ndaj shtetit dhe mesazhin që i jepet investitorëve të huaj për klimën e biznesit në Shqipëri.
Në fund të reagimit, Pacolli theksoi se do të vazhdojë të mbrojë interesin e punëtorëve dhe parimin që shteti duhet të jetë garant i ligjit dhe jo instrument presioni ndaj investitorëve.
