Si i vodhi stafi i BKT 1 milion dollar nga klientët, INSIG nuk pagoi dëmin
16 vite më parë, stafi i Bankës Kombëtare Tregtare në Vlorë përvetësoi duke vjedhur rreth 1 milion dollarë nga llogaritë e klientëve të ndryshëm. Pas disa kohësh hetime, autorët u identifikuan dhe u dënuan nga drejtësia, ndërsa banka kërkoi dëmshpërblim nga kompania e sigurimit INSIG duke dorëzuar policën e prerë sipas kontratës. Vjedhja e klientëve, në kufijtë e një skandali që zgjat prej afro dy dekadash, u shndërruar edhe në një betejë ligjore mes Bankës BKT dhe kompanisë së sigurimit INSIG.
Pak ditë më parë, Gjykata Kushtetuese vendosi të pranojë ankimin e BKT-së, duke i hapur rrugë rigjykimit të çështjes në Gjykatën e Lartë, aty ku më herët rekursi i bankës ishte rrëzuar. Ndërkohë, pretendimet e INSIG, të përfaqësuar në proces nga drejtori i përgjithëm i kompanisë, z. Kadri Morinaj, janë rrëzuar.
Por si ndodhi vjedhja prej 1 milion dollarësh në 2010?
Vjedhja ndodhi në vitin 2010, gjatë periudhës së vlefshmërisë së kontratës së sigurimit, kur një punonjës i bankës përvetësoi shuma të konsiderueshme nga llogaritë dhe depozitat e klientëve në degën e Vlorës. Ngjarja u zbulua nga kontrolli i brendshëm i bankës dhe lidhej me veprime të paligjshme në administrimin e llogarive bankare, duke shkaktuar një dëm të madh financiar.
Vjedhja u krye nga ish-punonjësi i bankës G.H., në bashkëpunim me shtetasin F.H., gjatë vitit 2010. Ata u shpallën fajtorë me vendim të formës së prerë për disa vepra penale, si vjedhje duke shpërdoruar detyrën, pastrim parash, falsifikim dokumentesh dhe ndërhyrje në të dhënat kompjuterike.
Pas zbulimit të ngjarjes në vitin 2010, banka kërkoi nga shoqëria e sigurimit INSIG dëmshpërblimin prej 1,000,000 USD sipas policës së sigurimit, si dhe interesat për vonesën në pagesë, pasi siguruesi nuk e njohu menjëherë rastin si të mbuluar.
Gjykata e Rrethit Gjyqësor Tiranë pranoi padinë e bankës dhe detyroi shoqërinë e sigurimit të paguante 1,000,000 USD dëmshpërblim, së bashku me interesat, duke vlerësuar se rasti hynte në mbulimin e policës së sigurimit.
Gjykata e Apelit Tiranë ndryshoi vendimin dhe rrëzoi padinë, duke arsyetuar se banka kishte siguruar tashmë dëmshpërblim nga autorët e dëmit dhe nuk mund të përfitonte dy herë, si dhe duke vënë në dyshim vlefshmërinë dhe kushtet e kontratës së sigurimit.
Gjykata e Lartë vendosi të mos pranojë rekursin e bankës, me arsyetimin se nuk plotësonte kriteret ligjore, duke lënë në fuqi vendimin e Apelit, shkruan WebLajm.
PËR KËTO ARSYE,
Gjykata Kushtetuese, në mbështetje të neneve 131, pika 1, shkronja “f” dhe 134, pika 1,
shkronja “i”, të Kushtetutës, si dhe neneve 71 dhe 72 të ligjit nr. 8577, datë 10.02.2000 “Për
organizimin dhe funksionimin e Gjykatës Kushtetuese të Republikës së Shqipërisë”, të
ndryshuar, njëzëri,
V E N D O S I:
Pranimin e kërkesës.
Shfuqizimin e vendimit nr. 00-2024-4553, datë 06.11.2024 të Kolegjit Civil të
Gjykatës së Lartë, si të papajtueshëm me Kushtetutën e Republikës së Shqipërisë.
Dërgimin e çështjes për shqyrtim në Gjykatën e Lartë.
Ky vendim është përfundimtar dhe hyn në fuqi ditën e botimit në Fletoren Zyrtare
