Skandal në Tiranë/ Mbetje kafshësh dhe kocka të hedhura në trotuar
Pamje skandaloze nga Tirana kanë mbërritur në redaksinë e Boldnews, ku në zonën e Astirit shihen të hedhura në trotuar mbetje kafshësh, lëkura dhe kocka.
Siç duken në videon e mëposhtme, mbetjet organike duken të shpërndara në një hapësirë publike, pranë ambienteve të frekuentuara nga qytetarë dhe automjete.
Ky skandal vjen vetëm pak ditë pas miratimit të IBAR-it, dokumenti që i hap rrugë Shqipërisë drejt integrimit europian.
Por pamje të tilla e vënë në pikëpyetje seriozitetin e qeverisë për të përmbushur standardet e BE-së në menaxhimin e mbetjeve dhe higjienën urbane.
Komisioni Europian ka theksuar se kapitulli 27 për mjedisin dhe klimën është një nga kushtet më të ndjeshme të negociatave, ndërsa raste si ky ekspozojnë mungesën e kapacitetit për të garantuar standarde minimale.
Në një kohë kur Tirana duhet të demonstrojë se është gati për të qenë pjesë e familjes europiane, pamjet e Astirit tregojnë një realitet të hidhur: qytetarët jetojnë mes plehrave, ndërsa institucionet heshtin.
Këto pamje nuk janë thjesht një problem estetik, por një alarm serioz për shëndetin publik dhe për imazhin e Shqipërisë. Autoriteti Kombëtar i Ushqimit (AKU), ka detyrimin ligjor të kontrollojë dhe të ndërhyjë kur mbetjet organike rrezikojnë higjienën e qytetarëve, por zyrtarët e këtij institucioni duket që nuk shqetësohen në këtë aspekt dhe mjaftohen me disa kontrolle rutinë të cilët i përdorin për progandën e tyre në rrjetet sociale.
POr ky skandal nuk është vetëm dështim i AKU, por edhe i Inspektoriatit të Mjedisit, i cili duhet të monitorojë hapësirat publike dhe të ndërhyjë kur ndotja rrezikon shëndetin e qytetarëve. Ky institucion duhet të garantojë zbatimin e ligjit për mbrojtjen e mjedisit, por siçi duket është i paaftë për të parandaluar situata të tilla.
Në të njëjtën kohë, ky skandal ekspozon kontrastin e madh mes realitetit në terren dhe imazhit që qeveria përpiqet të projektojë jashtë vendit.
Kryeministri Rama shpesh tërheq vëmendjen me batuta dhe gjeste servile në takimet ndërkombëtare, por ndërkohë situata brenda vendit mbetet alarmante: qytetarët jetojnë mes plehrave, mbetjeve të kafshëve dhe mungesës së kontrollit institucional.
