Skandali me fondet IPARD, SPAK gati komunikimi i akuzave
Prokuroria e Posaçme kundër Korrupsionit dhe Krimit të Organizuar (SPAK) është drejt përfundimit të fazës së hetimit paraprak për dosjen e shumëpërfolur të abuzimeve me fondet e programit IPARD. Burime pranë hetimit bëjnë me dije se në vijim pritet komunikimi i akuzave ndaj drejtuesve të Ministrisë së Bujqësisë të përfshirë në këtë çështje, ndërsa më pas në SPAK pritet të thirren edhe përfituesit e fondeve për t’u marrë në pyetje.
Në kuadër të këtij hetimi, ish-ministrja e Bujqësisë, Frida Krifca, ka dhënë dëshmi për disa orë të martën, më 17 mars, në ambientet e SPAK. Ajo është pyetur në cilësinë e personit që ka dijeni mbi rrethanat e çështjes, ndërsa paraqitja e saj ka kaluar kryesisht jashtë vëmendjes së mediave.
Hetimet po drejtohen nga prokurori Klodian Braho dhe janë intensifikuar ndjeshëm muajt e fundit, pas indicieve për shkelje serioze në administrimin e fondeve bujqësore. Procedimi penal nisi pas kallëzimit të Zyrës Evropiane Kundër Mashtrimit (OLAF), e cila evidentoi parregullsi në menaxhimin e fondeve të destinuara për zhvillimin rural në Shqipëri.
Si pasojë e rekomandimeve të OLAF, Bashkimi Evropian vendosi të ndërpresë financimin përmes programit IPARD 3, duke bllokuar një shumë të konsiderueshme fondesh që ishin parashikuar për mbështetjen e fermerëve shqiptarë.
Më 28 shtator 2023, SPAK njoftoi zyrtarisht nisjen e hetimeve për këtë çështje, duke konfirmuar bashkëpunimin e ngushtë me strukturat europiane kundër mashtrimit. Hetimet mbeten ende në zhvillim, ndërsa autoritetet kanë qenë të rezervuara në dhënien e detajeve për shkak të fazës paraprake.
Në tetor 2025, ish-kreu i SPAK, Altin Dumani, e riktheu në vëmendje këtë dosje gjatë një raportimi në Kuvend, duke theksuar se hetimet vijojnë dhe se po punohet ngushtë me OLAF për zbardhjen e plotë të rastit.
Deri më tani, mbi 20 persona janë marrë dhe pritet të merren në pyetje nga SPAK. Mes tyre është edhe Reni Ashiku, administrator i kompanisë “Converse Management Consulting” (CMC), i cili është paraqitur për t’u pyetur në lidhje me dyshimet për abuzim me fondet IPARD.
Dosja konsiderohet një nga hetimet më të rëndësishme për sa i përket menaxhimit të fondeve të Bashkimit Evropian në Shqipëri, ndërsa zhvillimet e mëtejshme pritet të përcaktojnë përgjegjësitë konkrete dhe masat ligjore ndaj personave të përfshirë.
