Gazetari Emirjon Senja ka bërë deklarata të forta lidhur me një tjetër skandal që, sipas tij, pritet të shpërthejë shumë shpejt dhe që mund të jetë edhe më i madh se ai i AKSHI-t.
Bëhet fjalë për procesin e digjitalizimit të Kadastrës dhe dyshimet për ndryshime të qëllimshme në hartat kadastrale, të kryera nga grupe interesi me synimin për të përvetësuar prona në zonat më të lakmuara të vendit.
Sipas Senjës, ky është një zhvillim me pasoja të rënda, pasi prek drejtpërdrejt pronat e mijëra qytetarëve dhe cenon sigurinë juridike të regjistrave të pronësisë.

Gazetari u shpreh se verifikimet për këtë çështje kanë nisur dhe se ajo që po zbulohet mund të përbëjë “skandalin më të madh të viteve të fundit”, me një impakt shumëfish më të gjerë se hetimet për tenderat e AKSHI-t.
“Ndërkohë që po flasim për AKSHI-n, në të njëjtin territor po gatuhet një ndër skandalet më të mëdhenj që mund t’i ndodhë një vendi, siç është ai i pronave. E kam fjalën për procesin e digjitalizimit të Kadastrës, hartave kadastrale dhe dokumenteve të pronësisë, ku ka të dhëna që grupe të caktuara kanë futur duart duke ndryshuar dokumentacionin, me qëllim përvetësimin e pronave në zonat më të lakmuara të këtij vendi. Jam i sigurt që do të mblidhemi sërish këtu dhe do të flasim për këtë skandal, përballë të cilit AKSHI është asgjë”, deklaroi ai në emisionin “Në Shënjestër”.
Paralajmërimi i Senjës ngre alarmin për një çështje që mund të prekë drejtpërdrejt sigurinë pronësore në Shqipëri, duke sinjalizuar një hetim të ri që pritet të trazojë institucionet dhe opinionin publik në ditët dhe javët në vijim.
