Tenderi E-GATE merr në qafë OBP! Ping Pong me 1.4 mln euro! I mori AlbaScan, më pas iu dhanë humbësve
//////
Një hetim i Prokurorisë së Posaçme (SPAK) ka vënë në fokus Komisionin e Prokurimit Publik (KPP), pas dyshimeve për parregullsi në shqyrtimin e një tenderi për instalimin e portave elektronike e-Gate në portet e Durrësit dhe Sarandës.
SPAK ka kërkuar të gjithë dokumentacionin që lidhet me procedurën e prokurimit, përfshirë vlerësimin fillestar të ofertave, procesin e ankimit dhe vendimmarrjen e KPP-së, pasi dyshohet për elementë të një afere korruptive.
Po të njëjtat burime konfirmojnë se, hetimi ka lindur fillimisht nga një procedim tjetër penal, por gjatë verifikimeve prokurorët kanë hasur indicie që lidhen me këtë tender dhe me mënyrën se si është trajtuar ankimi në KPP.
OBP nën sitën e SPAK, hetohen tenderat e “e-Gate” në portin e Durrësit dhe Sarandës
Tenderi ishte zhvilluar në muajin maj nga Operatori i Blerjeve të Përqendruara.
Tenderi rezulton të jetë hapur nga Operatori i Blerjeve të Përqendruara, në muajin Shkurt 2026. Në këtë procedurë kanë marrë pjesë disa kompani mes të cilave “Communication Progress” e Gentian Likaj, “PC Store”, “In Continu ET Services Sas”, “Infosoft Systems”, “TCN” e Adrian Shehut, “Novus”, “AlbaScan”, “Image & Communications Development”, “Dermalog Identification Systems” dhe të tjerë.
Ndërsa fituesi është shpallur Bashkimi i Operatorëve Ekonomikë i lidhur mes dy kompanive, “AlbaScan” e Elision dhe Elton Jorgjit që në këtë format pjesëmarrje (BOE) zotëron 65 për qind të tenderit dhe “Image & Communications Development” e Igli Gjelishtit, që zotëron 35 për qind të tenderit.
Këto dy kompani janë shpallur fituese nga Operatori i Blerjeve të Përqendruara, duke çuar ofertën ekonomike prej 1 milion euro me qëllim kryerjen e këtij shërbimi në dy Portet Shqiptare, atë të Durrësit dhe Sarandës.
Ndërsa u s’kualifikuan nga pjesëmarrja ofertuesit si “Infosoft Systems”, “Novus”, “PC Store”, “TCN” e të tjera. Ky është tenderi i parë që “AlbaScan” fiton edhe pse kompania dhe llogaritë e saj janë vendosur në sekuestro nga SPAK, për çështjen hetimore të paracaktimit të tenderave publikë që janë zhvilluar nga AKSHI.
Kompania “AlbaScan” është një shoqëri që ka fituar dhe tendera në SPAK me vlerë prej 1 miliard lekësh. Ndërkohë tashmë do implementojë një tjetër projekt me Igli Gjelishtin, atë të ndërtimin të portave elektronike në terminalin e portit të Durrësit dhe Sarandës.
Sipas dokumenteve të tenderit, objektivi i përgjithshëm i këtij projekti është projektimi, zhvillimi dhe implementimi i sistemit elektronik “Border Controller”, i cili do të mundësojë verifikimin e automatizuar të udhëtareve në 2 pika kufitare portuale të Republikës së Shqipërisë, Porti i Durrësit dhe Porti i Sarandës, me mundësi zgjerimi në të ardhmen në pikat e tjera kufitare detare apo tokësore.
Megjithatë, pas një ankimi të paraqitur nga kompania humbëse, Komisioni i Prokurimit Publik vendosi të rrëzojë rezultatin fillestar dhe t’ua heqë kontratën fituesve të parë, duke ia kaluar kompanisë ankimuese. Vendimmarrja e KPP-së nuk është publikuar në faqen zyrtare të institucionit. Palët janë njoftuar vetëm në mënyrë verbale, ndërsa mungesa e publikimit ka sjellë pezullimin e procedurës dhe bllokimin e projektit për dixhitalizimin e pikave të kalimit kufitar në portet e Durrësit dhe Sarandës.
Në kuadër të hetimeve, SPAK dyshon se në këtë procedurë mund të jenë të përfshirë edhe anëtarë të Komisionit të Prokurimit Publik. Për këtë arsye, prokurorët kanë kërkuar të gjithë praktikën administrative për të verifikuar ligjshmërinë e vendimmarrjes.
Ndërkohë, prej afro dhjetë ditësh, Komisioni i Prokurimit Publik ndodhet jashtë funksionit, pasi anëtarëve të tij u ka përfunduar mandati. Deri në emërimin e anëtarëve të rinj, institucioni nuk mund të ushtrojë funksionet e tij, duke lënë pezull edhe shqyrtimin e çështjeve të tjera të prokurimit publik.
