Tiranë/ Një person me levë sulmon dyqanin e One Albania: O plehra…thirrni policinë urgjent
Një incident i pazakontë është regjistruar në një nga dyqanet e One Albania, ku një person i pajisur me një levë ka hyrë në ambientet e biznesit dhe ka shkaktuar dëme materiale.
Sipas informacioneve paraprake, autori ka thyer xhamat e brendshëm dhe të jashtëm të dyqanit, duke krijuar panik te punonjësit dhe personat që ndodheshin aty pranë.
Pas aktit të vandalizmit, ai u është drejtuar punonjësve duke u kërkuar që të lajmëronin policinë. Ende nuk dihen me saktësi motivet e veprimit të tij, por dyshohet se mund të ketë qenë i pakënaqur me shërbimet ose politikat e kompanisë.
Megjithatë, burime paraprake bëjnë me dije se nuk përjashtohet as mundësia që autori të ketë pasur probleme të shëndetit mendor. Kjo mbetet një pistë që pritet të verifikohet nga autoritetet kompetente.
Policia ka nisur hetimet për të zbardhur rrethanat e plota të ngjarjes dhe për të përcaktuar motivin që e shtyu autorin të ndërmarrë këtë veprim. Fatmirësisht, deri më tani nuk raportohet për persona të lënduar.
