E bleva 19,500 euro, Dogana ma nxori 25 mijë euro” – qytetari nga Danimarka ngre shqetësim për vlerësimin e BMW-së në Portin e Durrësit
Një qytetar shqiptar që jeton në Kopenhagë të Danimarkës ka denoncuar pranë InfoNews.al një rast që, sipas tij, lidhet me mënyrën e vlerësimit të automjetit të tij nga Dogana Shqiptare.
Agron.Shehu thotë se ka blerë në Gjermani një BMW 320d, viti 2020, me rreth 145 mijë kilometra, për shumën 19,500 euro. Sipas tij, për blerjen disponon faturën, dokumentin e pagesës dhe të gjithë dokumentacionin shoqërues.
Makina është sjellë në Portin e Durrësit për zhdoganim. Por, sipas Shehut, agjencia doganore i ka komunikuar se Dogana Shqiptare e ka vlerësuar automjetin me 25 mijë euro, pra rreth 5,500 euro më shumë se çmimi që ai thotë se ka paguar realisht.
“Unë e kam blerë 19,500 euro. Kam faturën, pagesën dhe të gjitha dokumentet. Si doli që makina ime vlen 25 mijë euro?”, shprehet Shehu në denoncimin e tij.
Qytetari ngre pikëpyetje edhe për mënyrën se si është zbatuar Manuali i ri i Vlerësimit të Automjeteve, duke argumentuar se, në rastin e tij, ekzistojnë dokumentet që provojnë çmimin real të transaksionit.
Sipas Shehut, në manual përcaktohet se për automjetet e prodhuara brenda 10 viteve, të dhënat e marra nga interneti përdoren kur nuk plotësohen kushtet për vlerësimin sipas metodës së transaksionit dhe kur nuk mund të zbatohen metodat e tjera sipas radhës.
“Po unë faturën e kam. Pagesën e kam. Dokumentet i kam. Atëherë pse nuk merret çmimi real që kam paguar unë?”, pyet ai.
Shehu thekson se nuk kundërshton detyrimin për të paguar taksat dhe detyrimet doganore që i takojnë ligjërisht, por kërkon transparencë mbi mënyrën se si është përcaktuar vlera prej 25 mijë eurosh.
“Unë nuk po them të mos paguaj doganë. Le ta paguaj atë që më takon. Por nuk mund të më thuash makina jote vlen 25 mijë dhe kaq. Nuk mund të mbajmë ne qytetarët në kurriz gabimet apo paaftësinë e Doganës Shqiptare”, shprehet ai.
Sipas tij, diferenca prej 5,500 eurosh është një shumë e konsiderueshme dhe ai kërkon që autoritetet doganore të sqarojnë se mbi çfarë kriteresh, burimesh dhe të dhënash është përcaktuar vlera e automjetit.
“Ligji duhet zbatuar njësoj për të gjithë. Unë dua vetëm të paguaj detyrimin që më takon, jo një vlerë që nuk di nga ka dalë”, përfundon Shehu.
