Zbardhen komunikimet mes ish-drejtoreshës së SHISH, Vlora Hyseni, dhe Ergys Agasit, komunikime që, sipas SPAK, ngrenë dyshime për një marrëdhënie personale mes tyre dhe përtej kontakteve që mund të lidhen me funksionin zyrtar.
Sipas burimeve, në komunikimet e siguruara nga hetuesit përdoren edhe shprehje me tone personale dhe intime. Në një prej mesazheve, Vlora Hyseni i shkruan Ergys Agasit:
“Zemër, thjesht duhet të koncentrohemi te halli jot. Të gjithë ne. Do përfundojmë keq, shpirt.”
Një tjetër komunikim, i dërguar katër ditë para arrestimit të Agasit, thuhet se përmban mesazhin:
“Na kanë bërë shumë gjëra o shpirt… do ia hedhim… problemi është koha.”
Sipas SPAK, këto komunikime kanë një natyrë të ndryshme nga ajo që Hyseni ka deklaruar se kishte në kuadër të marrëdhënies së saj me Agasin si bashkëpunëtor.
O zemër…o shpirt, do përfundojmë keq! Vlora dhe Gysi si Bonnie and Clyde, zbardhen komunikimet
Çfarë deklaroi Hyseni në SPAK
Javën e kaluar, Vlora Hyseni është marrë në pyetje nga SPAK. Sipas burimeve, ajo ka pranuar se ka komunikuar me Ergys Agasin dhe se prej tij ka marrë informacione që lidheshin me Shërbimin Informativ të Shtetit.
Megjithatë, Hyseni ka mohuar se është takuar fizikisht me Agasin, si edhe ka mohuar se ka bashkëpunuar me të.
Hetuesit dyshojnë se përfshirja e Hysenit mund të ketë shkuar përtej një marrëdhënieje të zakonshme komunikimi dhe se ajo ka shfaqur gatishmëri për ta ndihmuar Agasin në çështjen penale në të cilën ai është përfshirë.
Në këtë kuadër, sipas informacioneve të bëra publike, SPAK po verifikon edhe nëse janë përdorur cilësitë zyrtare dhe kapacitetet institucionale që Hyseni drejtonte në atë kohë.
Dokumentet e gjetura në automjet
Një tjetër element i hetimit lidhet me automjetin e sekuestruar të Ergys Agasit në ambientet e Equos Resort.
Sipas burimeve, në automjet janë gjetur nëntë fletë formati, të cilat përmbanin diagrama dhe të dhëna që, sipas hetuesve, paraqesin ngjashmëri me materiale të prodhuara nga Shërbimi Informativ i Shtetit.
Këto materiale po shqyrtohen nga organi i akuzës për të përcaktuar origjinën e tyre dhe mënyrën se si kanë përfunduar në posedim të Agasit.
Hetimi vijon dhe komunikimet mes Hysenit dhe Agasit, së bashku me dokumentet e sekuestruara, pritet të jenë pjesë e verifikimeve të SPAK për të përcaktuar natyrën dhe shtrirjen e marrëdhënies mes tyre.
