Një grup turistësh të huaj kanë përjetuar probleme shëndetësore pas konsumimit të ushqimit në restorantin e një hoteli në Golem, ngjarje që ka sjellë edhe ndërhyrjen e Autoritetit Kombëtar të Ushqimit ( AKU ).
Helmohen turistët, AKU zbarkon te Premium Beach Hotel në Golem
Sipas burimeve të siguruara , turistët kanë shfaqur simptoma të helmimit ushqimor disa ditë më parë, pasi kishin konsumuar ushqim në restorantin e hotelit. Ata kanë marrë ndihmën e parë mjekësore, ndërsa më pas dyshimet janë përqendruar te një problem i mundshëm i lidhur me ushqimin.
Pas shqetësimeve të tyre, turistët kanë depozituar një ankesë pranë AKU-së përmes adresës zyrtare të institucionit, duke kërkuar verifikimin e situatës.
Në vijim të denoncimit, një grup inspektorësh të AKU-së, në bashkëpunim me përfaqësues të Inspektoratit Shtetëror Shëndetësor, kanë kryer një kontroll në ambientet e hotelit.
Gjatë inspektimit janë marrë mostra nga produkte të ndryshme ushqimore që përdoreshin në restorant. Mostrat janë dërguar për ekzaminim laboratorik, ndërsa inspektorët kanë dokumentuar gjetjet në një procesverbal të kontrollit.
Burimet bëjnë me dije se gjatë verifikimit në kuzhinë janë evidentuar edhe problematika që kanë të bëjnë me respektimin e kushteve higjieno-sanitare.
Një nga pistat që po shqyrtohet nga inspektorët lidhet me mundësinë që shqetësimet e turistëve të jenë shkaktuar nga një bakter i pranishëm në djathin që ata kanë konsumuar. Megjithatë, ky mbetet për momentin vetëm një dyshim dhe jo një përfundim zyrtar.
Rezultatet e analizave laboratorike pritet të përcaktojnë nëse produktet e marra si mostra kanë qenë të kontaminuara dhe nëse ekziston një lidhje mes tyre dhe problemeve shëndetësore të turistëve.
Ndërkohë, Skyweb.al i është drejtuar rrjetit të hoteleve Premium për një reagim lidhur me rastin, kontrollin e zhvilluar nga autoritetet dhe kushtet higjieno-sanitare në restorant. Deri në publikimin e këtij raportimi, nuk ka pasur një përgjigje zyrtare.
