Një tjetër kontratë milionëshe e Autoritetit Rrugor Shqiptar ngre pikëpyetje mbi mënyrën se si po shpërndahen paratë publike në tenderët e mëdhenj të infrastrukturës.
Në qendër të historisë është “G.P.G. COMPANY”, kompania ku biznesmeni Paqësor Buzi zotëron 50% të aksioneve. Emri i tij dhe i kompanisë janë përmendur në kuadër të hetimeve të SPAK-ut që lidhen me çështjen e ish-ministres së Infrastrukturës dhe Energjisë, Belinda Balluku.
Por ndërsa hetimet vazhdojnë, dyert e kontratave publike nuk janë mbyllur.
Përkundrazi, Autoriteti Rrugor Shqiptar ka shpallur fituese “G.P.G. COMPANY” në tenderin për “Rikonstruksionin e rrugës së vjetër Kombinat–Ndroq–Plepa, Loti 3”, një procedurë me fond limit rreth 1.36 miliardë lekë ose 14.4 milionë euro.
Sipas dokumenteve të tenderit, shfaqën interes 14 kompani. Nëntë prej tyre u skualifikuan nga ARRSH, ndërsa fituese u shpall “G.P.G. COMPANY”.Deri këtu mund të dukej si një procedurë normale prokurimi. Por tabela e ofertave e ndryshon tërësisht pamjen.
Nga nëntë kompanitë e skualifikuara, shtatë kishin paraqitur oferta më të ulëta se kompania e shpallur fituese. Pra, në vend që gara të përfundonte me një nga ofertat më ekonomike, ARRSH ka nxjerrë jashtë konkurrimit një varg operatorësh më të lirë dhe kontrata milionëshe ka përfunduar te “G.P.G. COMPANY”.
Ligjërisht, oferta më e ulët nuk është domosdoshmërisht oferta fituese, një operator mund të skualifikohet nëse nuk plotëson kriteret e përcaktuara në dokumentet e tenderit. Por kur shtatë oferta më të lira dalin jashtë garës dhe në fund fiton një ofertë më e shtrenjtë, të bën të mendosh nëse kemi të bëjmë me mosplotësim kriteresh apo me tender me fitues të paracaktuar.
Kompania që merr kontratën nuk është një emër i panjohur në tenderët e mëdha të infrastrukturës. Paqësor Buzi dhe kompania “G.P.G. COMPANY” janë pjesë e dosjes voluminoze të SPAK-ut mbi ish-ministren e Infrastrukturës dhe Energjisë, Belinda Balluku, ku po analizohen skemat e abuzimit me kontratat publike në rrugë e energji. Pas sekuestrimit të telefonave dhe pajisjeve elektronike të zyrtarëve të implikuar, hetuesit po zbërthejnë dyshimet se si kjo kompani, përmes bashkëpunimit me zyrtarë të linjës në ARRSH dhe KESH, mund të ketë përfituar rreth 160 milionë euro fonde publike me procedura fiktive e dokumente të manipuluara.
Fakti që një kompani apo pronari i saj është nën hetim nuk e bën atë automatikisht fajtore dhe as e përjashton nga e drejta për të marrë pjesë në tenderë publikë. Përgjegjësia penale përcaktohet vetëm nga gjykata.
Por kjo nuk e zhduk një pyetje tjetër, që është krejtësisht legjitime, si po zhvillohet konkurrenca për miliona euro të taksapaguesve dhe pse pikërisht kompanitë e përfshira në hetime rezultojnë fituese?
Sepse ndërsa SPAK heton tenderët e së shkuarës, makineria e prokurimeve vazhdon të prodhojë kontrata të reja për të njëjtët biznesmenë.
