Çfarë po ndodh me AlbChrome? Vendoset sekuestro mbi kuotat e kompanisë

Sekuestro konservative mbi kuotat e AlbChrome, bllokohet shitja dhe tjetërsimi i aksioneve

Një masë sekuestroje konservative është vendosur mbi kuotat e shoqërisë AlbChrome, duke kufizuar përkohësisht mundësinë e shitjes apo tjetërsimit të tyre. Sipas të dhënave të regjistruara për shoqërinë, Zyra Vendore Përmbarimore Tiranë sh.p.k. ka nxjerrë urdhrin nr. 16416 Prot., datë 3 korrik 2026, për vendosjen e masës së sekuestros konservative mbi kuotat e zotëruara nga pala debitore, shoqëria AlbChrome sh.p.k.

Urdhri është depozituar në regjistër më 9 korrik 2026. Me këtë masë kufizohet edhe kryerja e veprimeve që lidhen me shitjen apo tjetërsimin e kuotave të shoqërisë, shkruan InfoNews.al

Skema e turqve për zhvatjen e kromit – Albchrome humbi 15 milionë euro

Çfarë do të thotë masa?

Në rastin e AlbChrome, masa prek kuotat e shoqërisë dhe nuk nënkupton automatikisht sekuestrimin e aktivitetit, fabrikave apo aseteve fizike të kompanisë. Kufizimi lidhet me të drejtën për t’i shitur apo transferuar ato gjatë kohës që masa është në fuqi.

Kuotat e AlbChrome, edhe më parë objekt masash

Historiku i shoqërisë tregon se kuotat e AlbChrome kanë qenë edhe më herët objekt masash sigurie. Në vitin 2016, mbi aksionet e kompanisë ishte vendosur një sekuestro konservative në lidhje me detyrime ndaj KESH, masë e cila më vonë ishte liruar.

IKMT gjobit “Albchrome” në Elbasan për magazinimin e mbetjeve të rrezikshme

Në vitet pasuese janë regjistruar gjithashtu marrëveshje kolaterali dhe barra siguruese në favor të institucioneve financiare, disa prej të cilave janë çregjistruar më vonë.

Masa e re vjen në një periudhë të vështirë

Vendosja e sekuestros së re vjen në një periudhë kur AlbChrome është përballur edhe me zhvillime të tjera. Në maj të këtij viti, kompania u gjobit nga autoritetet mjedisore dhe aktiviteti i saj u pezullua përkohësisht pas konstatimit të mbetjeve të rrezikshme në ambientet e kompanisë.

Ku shkojnë paratë e kromit në Bulqizë? Thellohet skandali, Albchrome shkruan se humbi 720 mijë euro në 2024

Ndërkohë, të dhënat publike financiare tregojnë edhe për pagesa të kryera gjatë vitit 2026 në kuadër të ekzekutimit të vendimeve gjyqësore.

Megjithatë, nga të dhënat e disponueshme nuk rezulton ende qartë se cili është detyrimi konkret që ka çuar në masën e re të sekuestros, vlera e tij apo kush është pala kreditore.

Infonews.al do të ndjekë zhvillimet mbi arsyen e vendosjes së sekuestros, vlerën e detyrimit dhe palët e përfshira në procedurën përmbarimore./InfoNews.al