Pablo Escobari shqiptar? Kush është Shpëtim Aliu, daja i bosëve të kokainës

Salvatore Aliu, i njohur edhe si Shpëtim Aliu dhe i shpallur në kërkim nga drejtësia shqiptare, është arrestuar në Rusi me qëllim ekstradimin drejt Shqipërisë. Ai konsiderohet nga Prokuroria e Posaçme si një prej figurave kyçe të një rrjeti ndërkombëtar të trafikut të kokainës.

Në qershor 2026, Gjykata e Posaçme Kundër Korrupsionit dhe Krimit të Organizuar caktoi ndaj Aliut masën e sigurisë “Arrest në burg”. Ai dyshohet për veprat penale “Trafikimi i narkotikëve”, “Pastrimi i produkteve të veprës penale ose veprimtarisë kriminale”, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.

Sipas të dhënave të hetimit të SPAK, Aliu dyshohet se ka pastruar në Shqipëri të paktën 30 milionë euro të ardhura nga aktivitetet kriminale. Në skemën e dyshuar të investimit të parave, një rol të rëndësishëm thuhet se ka pasur vëllai i tij, Isa Aliu.

Sipas hetuesve, Isa Aliu rezulton i lidhur zyrtarisht me katër kompani, të cilat dyshohet se janë përdorur për investime në pasuri të paluajtshme, vila, apartamente, troje dhe ndërtime, përfshirë struktura hotelerie në zona turistike.

Një pjesë e rëndësishme e provave të dosjes lidhet me komunikimet në platformën SKY. Sipas SPAK, Salvatore Aliu përdorte disa identitete në komunikimet e tij, ndër të cilat “Dala”, “Qero”, “Qerosi”, “Viktor” dhe “Albo Pelon”.

Në një komunikim të gushtit 2020 me vëllain e tij, Isa Aliu dyshohet se e informon Salvatore Aliun se kishte në dispozicion 6 milionë euro. Dy javë më vonë, sipas hetimit, Salvatore i komunikon se priste edhe 20 milionë euro të tjera.

Në të njëjtat komunikime, sipas dosjes hetimore, Aliu i jep vëllait udhëzime për mënyrën e fshehjes së parave në pritje të investimit të tyre. Ndër alternativat e përmendura ishte edhe vendosja e shumave në fuçi 50-litërshe dhe groposja e tyre.

Hetimi ndaj rrjetit nisi në maj 2020, pas një referimi të Policisë së Shtetit. Sipas SPAK, Salvatore Aliu dhe persona të lidhur me të dyshohet se janë përfshirë në trafikun ndërkombëtar të kokainës nga Ekuadori drejt vendeve europiane.

Prokuroria e përshkruan Aliun si një prej drejtuesve të rrjetit, me rol në koordinimin e hallkave të ndryshme të trafikut: nga sigurimi i lëndës narkotike dhe financimi i ngarkesave, deri te furnizimi i grupeve të tjera kriminale.

Dosja hetimore e lidh emrin e tij edhe me disa prej emrave të njohur të botës së krimit shqiptar, ndërsa përmenden Çopjat, Eldi Dizdari, Dritan Gjika, Armando Pacani dhe grupi i Jetmir Pepës. Sipas hetimeve, këta persona dyshohet se kanë pasur role të ndryshme në rrjetin e aktivitetit kriminal.

Hetimet e SPAK mbulojnë periudhën 2019-2021. Sipas prokurorisë, gjatë kësaj kohe rrjeti dyshohet se ka tentuar të fusë në Europë rreth 50 tonë kokainë. Në dosje janë dokumentuar pesë episode të trafikimit të sasive të mëdha të kokainës, ku autoritetet kanë mundur të sekuestrojnë rreth 9 tonë.

Arrestimi i Salvatore Aliut në Rusi pritet të pasohet nga procedurat për ekstradimin e tij drejt Shqipërisë, ku ai do të përballet me akuzat dhe masën e sigurisë të caktuar nga gjykata shqiptare.