Me urdhër të SPAK janë ushtruar disa kontrolle në kuadër të një hetimi të nisur pas audiopërgjimeve të publikuara nga ish-zëvendëskryeministri Arben Ahmetaj, ku ngrihen dyshime për një skemë të mundshme të trafikimit të armëve dhe municioneve përmes Shqipërisë.
Skandali me trafik armësh
Burime bëjnë me dije se agjentë të Byrosë Kombëtare të Hetimit kanë ushtruar kontroll në vilën e biznesmenit shqiptaro-amerikan-izraelit Ron Yeffet, ndërsa kontrollet vijojnë ende.
Në kuadër të hetimit, GJKKO ka miratuar edhe kërkesën e SPAK për kontrollin personal të biznesmenit Yeffet. Kontrollet janë shtrirë edhe në ambiente të tjera, përfshirë Ministrinë e Mbrojtjes, ku, sipas burimeve, janë sekuestruar dokumente që lidhen me procedurat e tenderëve.
SPAK zbarkon në vilën e Ron Yeffet, kontrolle në banesën e biznesmenit
Edhe kompania TIMAK është pjesë e hetimit që po zhvillon SPAK.
Hetimi dyshohet se është nisur kryesisht pas publikimit nga Arben Ahmetaj të disa audiopërgjimeve, në të cilat ai pretendon se në qendër të bisedave janë biznesmeni Ron Yeffet dhe dy persona të identifikuar vetëm me emrat Igor dhe Sergei.
Sipas pretendimeve të bëra nga Ahmetaj, komunikimet lidhen me një skemë të dyshuar për trafikimin e armëve dhe municioneve përmes Shqipërisë. Në biseda përmenden KAYO dhe TIMAK, ndërsa referencat shkojnë edhe te projekte të tjera biznesi.
Në një pjesë të komunikimeve të publikuara përmendet krijimi i një kompanie të përbashkët, ku shteti do të zotëronte 20% të aksioneve, për një projekt energjetik në Delvinë. Një tjetër bisedë lidhet me një projekt për gazin në Vlorë, ku, sipas materialeve të publikuara, partnerët ukrainas do të krijonin një kompani në Shtetet e Bashkuara.
Pjesë e komunikimeve janë edhe referenca që, sipas interpretimit të Ahmetajt, ngrenë dyshime për trafikim të mundshëm armësh dhe municionesh të prodhuara në Afrikë, me pretendimin se paketimi i tyre do të kryhej në Shqipëri.
Gjatë bisedave përmenden në disa raste KAYO dhe TIMAK. TIMAK është përfshirë në një partneritet me ndërmarrjen shtetërore ushtarake KAYO, ndërsa TIMAK Defence është pjesë e këtij bashkëpunimi.
Yeffet dhe Arjeta Puca janë të lidhur në bashkëpronësi edhe me kompani të tjera në Shqipëri, ndër të cilat TIMAK AVIATION dhe UNO18, e cila operon në fushën e prodhimit dhe tregtimit të armëve, si dhe shoqëri të tjera.
Deri në këtë fazë, bëhet fjalë për një hetim në zhvillim dhe pretendimet e ngritura në audiopërgjimet e publikuara nuk përbëjnë në vetvete prova të një vepre penale. SPAK pritet të sqarojë në vijim objektin e plotë të hetimit dhe gjetjet e kontrolleve të kryera.
