Hetimet për vrasjen e 35-vjeçarit shqiptar Ferdinant Hoti, i gjetur i pajetë më 8 shtator në lumin Tergola, në San Giorgio delle Pertiche të Italisë, po zgjerohen edhe në drejtim të një rrjeti të dyshuar të shpërndarjes së drogës.
Sipas mediave italiane, pista e re është evidentuar gjatë një hetimi të karabinierëve të Miranos për një tjetër çështje që lidhet me trafikun e lëndëve narkotike.
Në kuadër të operacionit, autoritetet arrestuan Eris Makajn dhe partneren e tij, Noemi Karibba. Të dy ndodhen në burgun e Padovës, pas urdhrit të dhënë nga gjykata.
Makaj ishte prej kohësh në vëzhgim nga policia, e cila dyshonte se ai merrej me shpërndarjen e drogës. Gjatë një kontrolli të parë në apartamentin e tij në Spinea, hetuesit nuk gjetën prova të mjaftueshme për ta lidhur drejtpërdrejt me aktivitetin e dyshuar.
Megjithatë, hetimet vijuan dhe autoritetet dyshonin se ai shpërndante doza duke lëvizur me monopatinë dhe duke takuar klientët pranë automjeteve të tyre.
Një kontroll i dytë, këtë herë në banesën e të dashurës së tij, në rrugën Don Minzoni në Mirano, solli gjetjen e rreth 800 gramëve hashash, 200 gramëve kokainë dhe rreth 2 mijë eurove cash. Në operacion morën pjesë edhe efektivë të njësisë kinologjike.
Në kuadër të të njëjtit hetim është evidentuar edhe një lidhje e mundshme mes Eris Makajt dhe Luigji Makajt, 44 vjeç, i arrestuar në korrik në Mirano nën dyshimin për tentativë vrasjeje dhe armëmbajtje pa leje. Në atë rast ishte arrestuar edhe shqiptari Amiol Gjoka, 39 vjeç.
Tashmë hetuesit po shqyrtojnë nëse këto episode mund të kenë ndonjë lidhje me vrasjen e Ferdinant Hotit. Në fokus janë edhe lëvizjet, kontaktet dhe marrëdhëniet e personave që mund të kenë pasur lidhje me viktimën.
Megjithatë, deri në këtë fazë, lidhja mes hetimit për drogën dhe vrasjes së Hotit mbetet vetëm një pistë hetimore. Nuk ka një konfirmim zyrtar se Eris Makaj, Noemi Karibba apo personat e tjerë të përmendur kanë lidhje me vrasjen e 35-vjeçarit shqiptar.
Hetimet vijojnë nga autoritetet italiane, të cilat po përpiqen të zbardhin rrethanat, motivin dhe autorët e vrasjes.
